Uray No Maugotanen Ti Daga iti Asin

by Amado Yoro

Ditoyak kadaratan iti panagsana
Iti asin iti daga; siak daytoy mangiraud
Ti karudkodek nga ittip iti sinublan.

Mapukawto dagitoy a tugotko iti kanito a
makalikudak iti kadaratan. Mapunas a dagus
no dupraken ti ‘dalluyon’ ti biag.
Kas met ti anniniwan a mapasag.

Uray ti dalluyon pumanaw iti kadaratan,
santo manen agsubli-umay-pumanaw,  
kas iti ulep, agakar-akar; sa pumanaw met
a manglukas iti init a liningdanna itay–

ti asuk iti karaang, pumanaw met nga awan ti ibatina
ti ulep, agbaliwbaliw ti porma ken kalalangana

Magmagnatayo amin, ditoy man kadaratan
Ditoy man, kabingkolan, tanap, bambantay,
Padapada a dumtengto ti pannakaimbirna
dumtengto ti naituding nga uged
iti maminsan laeng a lumabastayo
ditoy a daga kas maysa a ganggannaet.

Panagsursuro ken pannakatubay
Inayatdaka kas tarabay
ken sanggir dagiti nabangon a rangtay
a kamang ti ungto ti bullalayaw
iti panagsukisok iti karaberan dagiti
nabunga a panagburasan iti ubas
dagiti nasam-it natubbog nga unas
dagiti narayray marisna a pinia a maburas
dagiti masukbol a bunga ti papaya
dagiti maubon a sabong  ti kalunatsi
ukkor dagiti mannala iti hula
haku lei dagiti napili ken sangaili

uray iti panagkallautang
iti ibabangon kas kadagiti mapaamo a karnero
Dagiti urbon a sumrek iti koral, mapaamo
Imasenda ti makapagsepsep iti asin, dilpatan
Iti daga ket kunnotenda ti mungay
Iti panagsursuro ken pannakatubay
Ngem anian, anian dagiti gundaway
Ti anag ti asin napukawen kas iti nagpsepsepan
Dagiti immuna a nagtagi-aklo-kosinero
main-inutdan a maipaigid ti dalan
Iti panagmaymaysada malnaawandan
Nga agkutkutimermer  iti kaltaang
Iti pannakabaybay-a; saan a panangikankano
Ken pannakaipusing
Ta awanen ti anag ti asin
A nagkunnotan
Dagiti kattungbol a parmata
Iti panagsursuro nga umaskaw
Kadagiti dalan iti kasamekan
ta nanglaylayen ti sabong nga ukkor
dagiti kassangpet……
naibasuradan iti igid iti ngilngilawen a
karinderia ken abong-abong
iti tugpatugpa a nagturogan ‘toy agsansana
iti darugsoy ti awan ti patinggana
a panagarubos ti ling-et, muging, iti bagi
iti darang ti anawang, ti karaang
iti sidiran ti kalapaw
a nalipatandan ti ridawna
ket tugotda pinunas ti atab
ken dalluyon dagiti panaginkukuna
ti panawen

ti damask
ti ugot
ti atab
dagiti makiraos a bagas
nga ipisok iti banga
dagiti makarudkod nga ittip
iti panagintutuleng ken
panagimbubulsek
iti nalikudan
ditoy, saanto latta nga agkir-in
ti kinaasino ni agsansana
ta isunto latta daydi immune
a nagkurob iti karaang iti igid
daytoy a sangkakelleng a kadaratan
dagiti masagat a danum a
maisaang iti siliasi ken sinublan
asin, wen asin no asin; tinapay no tinapay
kastoy ti kinapudno: adda rugi
adda puon, adda Kalman
adda agdama, adda sumaruno a dalluyon
iti kadaratan agpasagda: agbarekbek ti kadaratan
iisaangko latta ti sinublan. Asin ti biag
ituloyko a dildilpatan.


Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.